اونٹوں کی فارمنگ شروع کرنے میں انہیں کئی مشکلات کا سامنا رہا

ہالینڈ میں ماہرین تحقیقات کررہے ہیں کہ تاریخی طور پر فائدہ مند سمجھا جانے والا اونٹنی کا دودھ کیا واقعی کئی بیماریوں سے لڑنے کی تاثیر رکھتا ہے۔

مصر میں جزیرہ نما سنائی کے بدو زمانہ قدیم سے یقین رکھتے ہیں کہ اونٹنی کا دودھ تقریباً تمام اندرونی بیماریوں کا علاج ہے۔ ان کا خیال ہے کہ اس دودھ میں جسم میں موجود بیکٹیریا ختم کرنے کی صلاحیت ہے۔

اقوام متحدہ کے ادارہ برائے خوراک و زراعت کی ایک رپورٹ کے مطابق روس اور قزاقستان میں اکثر ڈاکٹر اونٹنی کا دودھ کئی مریضوں کے علاج کے لیے تجویز کرتے ہیں۔

بھارت میں اونٹنی کا دودھ یرقان، ٹی بی، دمہ ، خون کی کمی اور بواسیر کے علاج کے لیے استعمال کیا جاتا ہے۔

اور ان علاقوں میں جہاں اونٹنی کا دودھ خوراک کا باقاعدہ طور پر حصہ ہے وہاں لوگوں میں ذیابیطس کی شرح بہت کم پائی گئی ہے۔

ہالینڈ میں 26 سالہ فرینک سمتھس وہ پہلے شخص ہیں جنہوں نے باقاعدہ طور پر اونٹوں کی کمرشل فارمنگ کا کام شروع کیا۔ ان کے والد مرسل اعصابی امراض کے ماہر ڈاکٹر ہیں۔ انہوں نے شعبہ صحت کے اپنے ساتھیوں کو اس تحقیق کے لیے تعینات کیا کہ وہ یہ جان سکیں کہ ان کے بیٹے کی تیار کردہ مصنوعات کتنی فائدہ مند ہیں۔

صرف تین ہی سال کے عرصے میں ان کے کام نے مختلف حلقوں میں اتنی دلچسپی پیدا کردی کہ شعبہ صحت کی جانب سے ان کے لیے باقاعدہ فنڈنگ شروع کردی گئی۔

ڈاکٹر سمتھس کا کہنا ہے کہ اس دودھ میں اتنے فائدے ہیں کہ یہ یورپ کی صحت افزا خوراک کا حصہ بن سکتا ہے۔ ’اور ہم یہی کرنے کی کوشش کررہے ہیں‘۔

انہوں نے اپنی تحقیق کے بارے میں بتایا کہ ہسپتال میں ذیا بیطس کے مریضوں کو گروپوں میں تقسیم کرکے گائے یا اونٹنی کا دودھ باقاعدہ طور پر پلایا گیا اور پھر ان کے شوگر لیول کی جانچ کی گئی جس سے اونٹنی کے دودھ کی افادیت ظاہر ہوئی۔ انہوں نے مزید بتایا کہ اس سلسلے میں وسیع تر تحقیقات کی جارہی ہیں۔

یورپ میں اونٹوں کی درآمد بھی منع ہے

انہوں نے اپنی کمرشل فارمنگ کا آغاز تین اونٹوں سے کیا تھا اور اب ان کے پاس 40 اونٹ موجود ہیں۔ اگرچہ اس کام کے شروع کرنے میں انہیں کئی مشکلات کا سامنا رہا۔

ان کا کہنا ہے کہ یورپ میں اونٹوں کی فارمنگ شروع کرنا ایک مشکل کام تھا کیونکہ عرب ممالک کے برعکس یورپی یونین اونٹوں کو گائے، بکری وغیرہ کی طرح کا پیداواری جانور نہیں تسلیم کرتی۔ اس لیے انہیں حکومت سے خصوصی اجازت حاصل کرنی پڑی۔ یورپ میں اونٹوں کی درآمد بھی منع ہے۔ اور پھر اونٹوں کا دودھ دوہنے کا بھی مسئلہ تھا۔

فرینک سمتھس کا دعوٰی ہے کہ انہوں نے اونٹوں کا دودھ نکالنے والی دنیا کی پہلی مشین ایجاد کی ہے۔

انہیں شروع میں اپنی مصنوعات کے خریدار ڈھونڈنے میں بھی مسائل درپیش تھے۔ ابتدا میں انہوں نے اپنی مصنوعات مساجد کے باہر تقسیم کرنا شروع کیں جہاں مراکشی اور صومالیائی مسلمان اپنے ممالک میں اس خوراک کے عادی تھے۔ آہستہ آہستہ ان کی مصنوعات کی مانگ بڑھتی گئی۔

انہیں امید ہے کہ یورپ میں اونٹنی کے دودھ کی مصنوعات کی مانگ میں مزید اضافہ ہوتا جائے گا۔

گوگل کا کہنا ہے کہ یہ فراڈ اس کی جی میل کی سکیورٹی میں خامی کی وجہ سے نہیں ہوا

گوگل کے ای میل نظام ’جی میل‘ کوایک بہت بڑے فراڈ کا سامنا ہے جسے انٹرنیٹ کی زبان میں ’فشنگ‘ کہا جاتا ہے۔

گوگل کا کہنا ہے کہ اس نے فوراً ان اکاؤنٹس کو محفوظ کر دیا ہے جو اس فراڈ سے متاثر ہوئے تھے۔

بی بی سی نیوز کے پاس دو لسٹیں آئی ہیں جن میں مختلف ایم میل پروائڈرز کے اکاؤنٹ ہولڈرز کے تیس ہزار سے زائد نام اور پاس ورڈز دیے گئے ہیں۔ ان اکاؤنٹس کی تفصیل آن لائن شائع کی گئی ہے۔

ان لسٹوں میں مائیکروسافٹ کے ہاٹ میل اکاؤنٹ کے ہزاروں یوزرز یا استعمال کرنے والے بھی شامل ہیں۔ گوگل کا کہنا ہے کہ اس کے بھی پانچ سو کے قریب اکاؤنٹس اس فراڈ سے متاثر ہوئے ہیں۔

تاہم سرچ انجن نے یہ بھی بتایا ہے کہ اسے ایک تیسری لسٹ بھی ملی ہے۔ لیکن اس نے یہ نہیں بتایا کہ اس میں کتنے متاثرہ اکاؤنٹس ہیں۔

’فشنگ‘ میں جعلی ویب سائٹس کے ذریعے لوگوں کو پھانسا جاتا ہے کہ وہ اپنے متعلق ڈیٹا یعنی بینک اکاؤنٹس اور لوگ ان کرنے والے نام بتائیں۔

گوگل کے ایک ترجمان نے بتایا کہ ’ہمیں حال ہی میں اس فراڈ کے متعلق پتہ چلا ہے جس کا اس پوری صنعت کو سامنا ہے۔ اس میں ہیکرز یوزرز کے متعلق تفصیل حاصل کر لیتے ہیں جن میں جی میل اکاؤنٹس بھی شامل ہیں۔‘

گوگل کا اصرار ہے کہ یہ فراڈ جی میل کی سکیورٹی میں کمی نہیں ہے بلکہ ایک فراڈ ہے جس میں ہیکرز یوزرز سے ان کی ذاتی تفصیل حاصل کر لیتے ہیں۔

راکٹ کو دھکیلنے والا خلائی جہاز پہلے سائنسی تحقیق کرے گا اور پھر خود بھی چاند کی سطح سے ٹکرا جائے گا

امریکی خلائی ادارے ناسا کے خلا بازوں کے بغیر اڑائے جانے والے دو خلائی جہاز چاند پر پانی کی موجودگی کی کھوج لگانے کی ایک کوشش میں چاند کی سطح سے ٹکرانے والے ہیں۔

پہلے مرحلے میں دو ہزار دو سو کلو گرام وزنی راکٹ چاند کی سطح سے ٹکرائے گا جس سے بڑے ٹکڑے اور ذرات چاند کی فضا میں بلند ہوں گے۔

دوسرا جہاز جس میں سائنسی آلات موجود ہوں گے اس سارے تجربے کا مشاہدہ کرے گا اور اس کے بعد خود بھی چاند سے ٹکرا جائے گا۔

سائنسدانوں کے مطابق اس ٹکراؤ کے بعد چاند پر اٹھنے والے مرغولے میں پانی۔برف کی شناخت کے متعلق اہم دریافت کی توقع ہے۔

چاند پر پانی کی موجودگی مستقبل میں کی جانے والی انسانی تحقیق کے لیے بہت اہم ہے۔

چاند کے قطب پر بڑے عرصے سے موجود کریٹرز کے متعلق سائنسدان کہتے رہے ہیں کہ وہاں پانی موجود ہے لیکن اس کی کبھی تصدیق نہیں ہو سکی۔

اس 79 ملین ڈالر کے مشن کو لکروس (دی لونر کریٹر آبزرویشن اینڈ سینسنگ سیٹیلائیٹ) کہا جا رہا ہے۔

چاند سے جا کر ٹکرانے والے راکٹ کے دو حصے ہیں۔ بڑا ’سینٹار‘ راکٹ اگلا حصہ ہے جبکہ خلائی جہاز کو دھکیلنے کے لیے ایک چھوٹا حصہ ہے۔

جون میں کیپ کارنیوال، فلوریڈا سے خلا میں بھیجے جانے سے قبل ان دونوں حصوں کو جوڑ دیا گیا تھا۔

خلائی جہاز کو لے کر جانے والا حصہ اس طرح بنایا گیا ہے کہ وہ راکٹ کو اس کے ٹارگٹ کی طرف لے کر جائے جو کہ چاند کے جنوبی قطب میں ایک سو کلو میٹر لمبا سایہ دار کریٹر ہے جسے ’کیبیس کریٹر‘ کہتے ہیں۔

جمعہ کی صبح سینٹار کو اس کو دھکیلنے والے حصے سے الگ کر دیا گیا ہے۔

برٹش سٹینڈرڈ ٹائم کے مطابق بارہ بجکر اکتیس منٹ پر راکٹ چاند کے جنوبی قطب سے تقریباً گولی کی دگنی رفتار سے ٹکرائے گا، جس سے اندازاً تین سو پچاس میٹرک ٹن کے برابر ٹکڑوں کا غبار دس کلو میٹر تک چاند کی فضا میں بلند ہو گا۔

تقریباً ڈیڑھ ٹن ٹی این ٹی کی طاقت کے برابر ہونے والے اس دھماکے سے چاند کی سطح پر سڑسٹھ فٹ چوڑا اور تیرہ فٹ گہرا گھڑا بن جائے گا۔

ٹھیک اس کے چار منٹ کے بعد راکٹ کو لے کر جانے والا خلائی جہاز دھماکے کی شدت سے اٹھنے والے غبار اور ذرات کے مرغولے کے درمیان میں سے ہوتا ہوا چاند کی سطح سے ٹکرائے گا۔

اس پر موجود آلات اڑنے والے غبار میں پانی، ہائیڈروکسل کمپاؤنڈ، نمکیات، مٹی، آبیدہ معدنیات اور دوسرے نامیاتی خلیوں کا پتہ لگائیں گے۔